Давлат хизматларини кўрсатишда бюрократизм ва бошқа маъмурий тўсиқларни бартараф этишга қаратилган Президент Фармони лойиҳаси эълон қилинди.
Лойиҳага кўра, 2021 йил 1 мартдан бошлаб қуйидаги хизматлар экстерриториал тамойили бўйича, яъни Ўзбекистоннинг исталган ҳудудида фуқароларнинг пропискасига ёки юридик шахсларнинг рўйхатдан ўтган жойига қарамасдан амалга оширилиши мумкин:
- фуқаролик ҳолати далолатномаларини қайд этиш;
- никоҳланувчи шахсларни тиббий кўрикдан ўтказиш;
- хорижга чиқиш биометрик паспортини расмийлаштириш;
- тиббий-ижтимоий эксперт комиссияларида кўрикдан ўтиш;
- транспорт воситаларини мажбурий техник кўрикдан ўтказиш.
Шунингдек, ушбу Фармонда қуйидагилар таклиф этилмоқда:
Нотариал ҳаракатларни амалга оширишда фуқаролик ҳолати далолатнома ёзувлари “ФҲДЁнинг ягона электрон архиви” ахборот тизими орқали олинади. Агар Давлат хизматларини кўрсатишда ариза ёки унга илова қилинган ҳужжатларда хатолар мавжуд бўлса, ёхуд талаб қилинган ҳужжатлар етишмаса ваколатли орган хизматни кўрсатишни рад этмасдан, уларни тўғрилаш учун аризачига имконият ва муддат беради.
Тадбиркорлик субъекти бўлган юридик шахсларга давлат хизматларидан фойдаланиш учун белгиланган йиғим ва давлат божи тўловларини тўлашда юридик шахснинг вакилидан нақд пул шаклида тўловни амалга оширишга рухсат берилади.
Давлат хизматини кўрсатиш натижасида бериладиган ҳужжатлар QR-код (матрик штрихли код) қўйиш орқали берилганда уларнинг дубликатларини ҳақ эвазига бериш бекор қилинади. Уларни электрон кўринишда Ягона портал орқали чекланмаган миқдорда бепул олиш имкони бўлади.
Агар фуқаролар ва тадбиркорлик субъектлари лицензия ва рухсатнома олиш учун ариза берсаю, лекин ваколатли орган белгиланган муддат давомида бермаса ёки рад қилмаса, унда мазкур лицензия ва рухсатнома берилган деб ҳисобланади ва автоматик шакллантирилиб, талабгорга юборилади.
Биометрик паспорт ўрнига ID-карта жорий этилади.
Давлат хизматлари агентлиги юридик шахсларни давлат рўйхатидан ўтказиш бўйича ягона ваколатли орган этиб белгиланади (ННТлар мустасно). Давлат органлари, давлат муассасалари, банклар ва кредит бюролари, шунингдек хусусий уй-жой мулкдорлари ширкатлари, матбуот, ишлаб чиқариш, қишлоқ хўжалиги кооперативларини давлат рўйхатидан ўтказиш Агентлик томонидан амалга оширилади.
16 ёшга тўлган шахсларга идентификация ID-карталари бериш уларни давлат солиқ хизмати органларида ва жамғариб бориладиган пенсия тизимида ҳисобга қўйиш бир вақтнинг ўзида амалга ошириш.
Солиқ органларида СТИР (ИНН) ўрнига жисмоний шахснинг шахсий идентификация рақамидан (ЖШШИР) фойдаланади. ЖШШИР давлат, банк, ижтимоий ва бошқа хизматларни кўрсатишда фуқаронинг шахсини тасдиқловчи ягона идентификатор ҳисобланади.
Янгиликларни телеграмда ўқинг